Dağıstan rəhbərliyi silahlı hücumda ölənlərlə bağlı hərəkətə keçdi

Dağıstan rəhbərliyi Mahaçqala və Dərbənddə törədilən terror aktları nəticəsində həlak olan və yaralananların yaxınlarına yardım üçün 50 milyon rubl, yəni 965 min manat ayırıb.

Bu barədə yerli media məlumat yayıb.

Bildirilib ki, sözügedən məbləğ hökumətin ehtiyat fondundan “Hamı birlikdə” adlı regional sosial fonda köçürüləcək.

Bundan əvvəl regionun rəhbəri Sergey Məlikov qeyd edib ki, həlak olanların ailələrinə, yaralananların isə aldığı xəsarətin dərəcəsindən, ağırlığından asılı olaraq 1 milyon rubl, yəni 19 min manat veriləcək.