Danışıqlar mümkündür, amma təzyiq qəbuledilməzdir

ABŞ ilə danışıqlar İranın milli maraqlarını irəli aparmaq, xalqın hüquqlarını bərpa etmək və müqaviməti möhkəmləndirmək vasitəsidir.

Bu barədə İran parlamentinin sədri Məhəmməd Baqir Qalibafın "Keyhan" qəzetinə ünvanladığı məktubunda qeyd olunub.

"Güc vasitələrini mühafizə etməliyik ki, müharibənin nailiyyətlərini möhkəmləndirək və ölkəni düşmənlərin planlaşdırdığı böyük bəlalardan sağ-salamat keçirə bilək", – deyə o yazıb.

Qalibafın sözlərinə görə, İran hazırda böyük problemlərlə üz-üzədir: "Bizim vəzifəmiz gücümüzü və vaxtımızı xalqın problemlərinin həllinə, İranın qüdrətinin artırılmasına, müqavimət nailiyyətlərinin qorunmasına və düşmənin uğursuzluğa düçar edilməsinə sərf etməkdir".

“ABŞ iqtisadi təzyiqdən heç nə qazanmayacaq”. Bunu isə İran Prezidenti Məsud Pezeşkian deyib.

O əlavə edib ki, Tehranın yanaşması məsələlərin danışıqlar yolu ilə həllinə yönəlib, lakin iqtisadi təzyiqə qarşı qətiyyətli olmağa davam edir.