Dəfələrlə demişik ki, müharibə istəmirik, halbuki... | İran xarici işlər naziri

Omanın vasitəçiliyi ilə İran və ABŞ arasındakı danışıqlar prosesi Yaxın Şərqdəki xüsusi vəziyyətə görə dayandırılıb.

Bu barədə İranın xarici işlər naziri Abbas Əraqçi Omanın paytaxtı Maskata səfəri zamanı deyib.

“Bölgədəki xüsusi vəziyyətə görə hazırda Maskat prosesi dayandırılıb. İndi danışıqlar üçün əsas görmürük. Mövcud böhrandan çıxa bilən kimi bu işə qayıdıb-qayıtmayacağımıza qərar verəcəyik”, – deyə iranlı nazir bildirib.

Onun sözlərinə görə, Oman həmişə Yaxın Şərqdə mühüm rol oynayıb, müxtəlif münaqişələrin həllinə kömək edib və Tehranla Vaşinqton arasındakı münasibətlərdə vasitəçilik xidmətləri göstərib.

“Həm ABŞ, həm Avropa ölkələri, həm də region ölkələri Tehranın mövqeyinin necə olduğunu bilməlidir. Mövqeyimiz tam aydındır. Dəfələrlə təkrar etmişik ki, müharibə və münaqişələr istəmirik, halbuki buna tam hazırıq. Hesab edirik ki, diplomatiya işləməli və bunun qarşısını almalıdır. Region yüksək hazırlıq vəziyyətindədir və genişmiqyaslı münaqişələr astanasında ola bilər, diplomatiya isə böyük böhranların qarşısını almaq və gərginlikdən, müharibədən yayınmaq üçün yeganə yoldur”, – deyə İranın xarici işlər naziri əlavə edib.