Dəhşətli hadisə | Çex Respublikasında matəm elan edildi

Çex Respublikasında universitetdə baş verən faciə ilə əlaqədar dekabrın 23-nün matəm günü elan edilməsi ilə bağlı qərar qəbul edilib.

Bu barədə ölkənin Baş naziri Petr Fiala Nazirlər Kabinetinin fövqəladə iclasından sonra keçirilən mətbuat konfransında deyib.

İclasda iştirak etmək üçün günlük iş proqramını ləğv edən ölkə başçısı Petr Pavel isə sözügedən atışmanı “Çex Respublikasının tarixində ən faciəli hadisə” kimi qiymətləndirib:

“İlk olaraq onlarla gəncin həyatını itkisi ilə nəticələnən hadisə ilə əlaqədar dərin kədər və qəzəbimi bildirmək istəyirəm. Hadisə nəticəsində həlak olan şəxslərin ailələrinə dərin hüznlə başsağlığı vermək istəyirəm. Hesab edirəm ki, bu hadisə Çex Respublikasının tarixində ən faciəli hadisədir və atışma nəticəsində yaralananların tez bir zamanda sağalmalarını diləyirəm”.

Məlumat üçün bildirək ki, paytaxt Praqada yerləşən Karlova Universitetinin fəlsəfə fakültəsində baş verən atışma nəticəsində hadisəni törədən şəxs də daxil olmaqla, 15 nəfər həyatını itirib, daha 24 nəfər yaralanıb. Xəsarət alanların bəzilərinin vəziyyətinin ağır olduğu bildirilir.