Dizel yanacağı ixracının dayandırılması barədə göstəriş verildi

Macarıstan Ukraynaya dizel yanacağı ixracına qadağa qoyub və "Drujba" magistral kəməri ilə neft tədarükü bərpa olunana qədər ixracı bərpa etməyi planlaşdırmır.

Belə bəyanatla ölkənin xarici işlər və xarici iqtisadi əlaqələr naziri Peter Siyarto çıxış edib.

O bildirib ki, buna səbəb "Drujba" neft kəməri ilə tranzitin dayandırılmasıdır.

Nazir həmçinin vurğulayıb ki, enerji daşıyıcılarının tədarükü ilə bağlı vəziyyət Macarıstanın enerji təhlükəsizliyi üçün kritik əhəmiyyət daşıyır.

Macarıstandan sonra Slovakiya da analoji addım atıb. Ölkənin Baş naziri Robert Fitso Ukraynaya dizel yanacağı ixracının dayandırılması barədə göstəriş verib.

Baş nazir ekspertlərdən ibarət qrupun Ukraynanın Lvov bölgəsinə ezam olunmasını və "Drujba" kəmərinin zədələnmiş hissəsini yerindəcə analiz etməsini məsləhət görüb. Fitso Ukraynanın indiyə qədər insidentlə bağlı heç bir məlumat vermədiyini və buna görə də səfirin Kiyevə vəziyyəti aydınlaşdırmaq üçün müraciət etdiyini açıqlayıb.