Dövlət Bağçalıdan ŞKTR-in parlamentinə çağırış | Türkiyəyə birləşmək...

Türkiyənin Milliyyətçi Hərəkat Partiyasının sədri Dövlət Bağçalı Şimali Kipr Türk Respublikasında keçirilən prezident seçkilərinin ilkin nəticələrinə münasibət bildirib.

O, ŞKTR parlamentini təcili iclas keçirməyə çağırıb.

MHP sədri bildirib ki, parlamentarilər ŞKTR-in Türkiyəyə birləşməsinə qərar verməlidirlər.

“ŞKTR-də baş tutan seçkilərin nəticələri çox az seçicinin iştirakı ilə əldə olunub. Kipr türklərinin taleyi bu iştirakla təmsil edilə bilməz. Seçkilərin nəticəsi seçki şurası tərəfindən açıqlanmış olsa belə, ŞKTR parlamenti təcili şəkildə iclas keçirməli, seçki nəticələri və federasiyaya geri dönüşün qəbul edilməyəcəyi elan edilməli, ölkənin Türkiyə Respublikasına qatılmasına qərar verilməlidir”, ‒ deyə D.Bağçalı vurğulayıb.

Bu arada, Türkiyə Prezidenti Rəcəb Tayyib Ərdoğan ŞKTR-in yeni seçilmiş prezidenti Tufan Erhürmanı təbrik edib. Ərdoğan bu barədə “X” hesabında paylaşım edib.

“ŞKTR-də keçirilən seçkilərin qeyri-rəsmi nəticələrinə görə bu gün prezident seçilən cənab Tufan Erhürmanı təbrik edirəm. ŞKTR-in demokratik yetkinliyini bir daha nümayiş etdirən, kiprli türk qardaşlarımızın iradəsini seçki qutusunda əks etdirən bu seçkinin ölkələrimiz və bölgəmiz üçün faydalı olacağını ümid edirəm. Türkiyə olaraq ŞKTR-in suverenlik hüquq və mənafelərini kiprli türk qardaşlarımızla birlikdə hər platformada müdafiə etməyə davam edəcəyik”, ‒ deyə Ərdoğan bildirib.

Qeyd edək ki, ŞKTR-də oktyabrın 19-da keçirilən prezident seçkilərində ilkin nəticələrə görə, Cümhuriyyətçi Türk Partiyasının sədri Tufan Erhürman qalib gəlib.