Dünya yeni pandemiya ilə üzləşir? - “Pandoranın qutusu” açılır

Buzlaqların əriməsi ilə əlaqədar olaraq dünya qarayara və bəşəriyyətə məlum olmayan digər xəstəliklərin yeni epidemiyası təhlükəsi ilə üzləşə bilər.

Amerikalı təkamül bioloqu Skott Trevers bu barədə xəbərdarlıq edib.

Alimin sözlərinə görə, Şimal yarımkürəsinin 15 faizi minilliklər boyu buzun içində qalmış “bioloji kapsul” ilə örtülüdür. Burada üzvi maddələr, güclü istixana qazları, daha təhlükəli olan qədim mikroorqanizmlər – bakteriyalar və viruslar saxlanılıb.

Min illər ərzində stabil qalan əbədi buzlaqlar indi sürətlə əriyir və gizlənmiş bu mikrobları üzə çıxarır.

S.Trevers bildirib ki, bu buz qatı Arktikanın ekosistemini sabit saxlayan təbii əsasdır. Lakin ərimə prosesi gözlənilməz nəticələrə səbəb ola bilər.

S.Trevers vurğulayıb ki, bu, bir növ “Pandora qutusu” kimidir. Hələ bilmirik ki, həmin mikroorqanizmlər insanlar, heyvanlar və ya bitkilər üçün real təhlükə təşkil edəcək, yoxsa sadəcə ekosistemdə izsiz yox olacaq? Lakin bir şey dəqiqdir: əbədi buzlaqların əriməsi ilə bilinməyən bioloji riskin astanasında ola bilərik.