Dünyaya səs salan "Tayfun Blok-4"ün gücü | Rusiya, İran, Çin və ABŞ ilə müqayisə - HƏRBİ XRONİKA

“Hərbi Xronika” rubrikasının yeni buraxılışında Türkiyənin müdafiə sənayesində, xüsusilə raket texnologiyaları sahəsində əldə etdiyi son mühüm nailiyyətlər və bunun regional-strateji balanslara mümkün təsiri müzakirə olunub.

Qeyd edilib ki, İran–ABŞ–İsrail xəttində gərginliyin danışıqlar mərhələsinə keçməsi fonunda bu mövzu qismən arxa planda qalsa da, aprel ayı Türkiyənin müdafiə sənayesi üçün əlamətdar nəticələrlə yadda qalıb.

Bildirilib ki, ROKETSAN tərəfindən keçirilən son tədbirdə şirkətin dünyanın aparıcı müdafiə sənayesi aktorlarından biri kimi mövqeyi bir daha təsdiqlənib.

Vurğulanıb ki, sektorun transformasiyasında əsas istiqamətlərdən biri raket texnologiyalarıdır. Bu kontekstdə diqqət mərkəzində olan əsas sistem isə “Tayfun Blok-4” raketi olub.

Qeyd olunub ki, sözügedən sistem əvvəlki BORA və ilkin TAYFUN mərhələlərindən fərqli olaraq tamamilə yeni texnoloji səviyyəni təmsil edir. Təxminən 10 metr uzunluğa və 7 tonadək kütləyə malik raketin 700–1000 kiloqramlıq döyüş başlığı daşıdığı, real mənzilinin isə 1000–1500 kilometrdən artıq olduğu bildirilib.

Diqqətə çatdırılıb ki, raketin əsas üstünlüklərindən biri yüksək dəqiqliyidir. Təxminən 5 metrlik yayınma göstəricisi onu strateji zərbə vasitəsi kimi ön plana çıxarır.

Ekspert dairələrinin bu platformanın gələcəkdə 2000, hətta 3000 kilometrlik mənzil sinfinə yüksələ biləcəyini istisna etmədiyi də qeyd olunub. Bu isə Türkiyənin artıq ortamənzilli ballistik raket kateqoriyasına daxil olmaq üzrə olduğunu göstərir.