Ermənistanda aləm bir-birinə dəydi | Müxalifətçi deputatlara kim hücum etdi?

İyulun 8-i Ermənistan parlamentində növbədənkənar iclas zamanı deputatlar arasında növbəti dəfə əlbəyaxa dava düşüb.

"Ermənistan" fraksiyasının deputatı Artur Sarkisyanın toxunulmazlığının ləğvi ilə bağlı vəsatət müzakirə olunub.

Müzakirədən sonra Sarkisyan çıxış edərək bildirib ki, onun işi ilə bağlı artıq qərar qəbul edilib.

“Artıq hər şey həll edilib. Mənim üçün dəyərli olan zamanımı yeniyetmə övladlarıma və həyat yoldaşıma ayıracağam, onlarla söhbətdən sonra birlikdə kilsəyə gedərək şam yandırıb, dualar edəcəyik. Daha sonra isə mən istintaq komitəsinə gedəcəyəm”, ‒ deyə deputat çıxışında vurğulayıb.

Sarkisyan heç bir suala cavab vermək istəməyib. Bundan sonra parlamentdə vəziyyət gərginləşib və deputatlar bir-birinə yumruq atmağa başlayıblar.

"Vətəndaş müqaviləsi" partiyasının üzvü Vaqe Qalumyan Sarkisyanın çıxışından sonra ona hücum etməyə cəhd göstərib. Daha sonra naməlum şəxslər iclas otağına daxil olaraq, müxalifətçi deputatlara hücum ediblər.

Milli Assambleyanın sədr müavini Ruben Rubinyan fasilə elan edib.