Ermənistanda Rusiyanın 102-ci hərbi bazasının çıxarılması tələbi ilə etiraz aksiyası keçirilib

Ermənistanın Gümrü şəhərində Rusiyanın 102-ci hərbi bazasının tamamilə çıxarılması tələbi ilə etiraz aksiyası keçirilir.

Məlumata görə, hərbi baza yaxınlığında keçirilən aksiyanı “Respublika naminə” partiyası və onun tərəfdarları təşkil edib.

Etirazçılar Ermənistan hökumətindən Rusiya hərbi bazasının ölkə ərazisindən tamamilə çıxarılmasını tələb edirlər.

“Respublika naminə” partiyasının sədri Armen Babacanyan deyib ki, Rusiya bazası Ermənistanın təhlükəsizliyini təmin etmədiyi üçün ölkə ərazisində qalmasının əhəmiyyəti yoxdur.

Onun fikrincə, ölkənin təhlükəsizliyini öz silahlı qüvvələri təmin etməlidir.

Maraqlıdır ki, eyni gündə müxalif “Ana Ermənistan” partiyası da Gümrü şəhərində Rusiyanın 102-ci hərbi bazasının müdafiəsi üçün etiraz aksiyası təşkil edib.

Aksiyanın təşkilatçısı, partiya sədri Andranik Tevanyan tərəfdarlarını baş verənlərə boyun əyməməyə çağırıb.

A.Tevanyan Nikol Paşinyan hökumətini Rusiya hərbi bazasını Ermənistandan çıxarmağa çalışmaqda ittiham edib. Partiya rəhbəri 102-ci bazanın ölkədə qalmalı olduğunu bildirib.

A.Tevanyan Ermənistan hakimiyyəti tərəfindən dəstəklənən qərbpərəst qüvvələrin bazanın çıxarılması üçün səfərbər olduğunu iddia edib.