Ersin Tatar seçkilərin nəticələrini tanıdı

Şimali Kipr Türk Respublikasının hazırkı prezidenti və bu posta yenidən namizəd olmuş Ersin Tatar keçirilən prezident seçkilərinin ilkin nəticələrinə görə qalib gələn rəqibi Tufan Erhürmanı təbrik edib.

E.Tatar bu barədə mediaya açıqlamasında danışıb.

O, seçkilərin demokratik şəraitdə keçdiyini bildirərək, özünə səs verən vətəndaşlara təşəkkür edib.

"Tufan bəyi də təbrik edirəm", ‒ deyə ŞKTR-in hazırkı prezidenti bildirib.

O, "yeni hökumətin Kipr məsələsində necə bir yol izləyəcəyini hamılıqla görəcəyik", ‒ deyə əlavə edib.

Qeyd edək ki, Şimali Kipr Türk Respublikasında oktyabrın 19-da keçirilən prezident seçkilərində ilkin nəticələrə görə, Cümhuriyyətçi Türk Partiyasının sədri Tufan Erhürman qələbə qazanıb. O, adada federasiya qurulmasının tərəfdarı kimi tanınır.

T.Erhürman seçkinin ilkin nəticələri bəlli olduqdan sonra partiya sədrliyindən istefa verdiyini açıqlayıb və bu addımını bütün Kipr xalqının prezidenti olacağı ilə bağlayıb.