Ev tapşırığı yoxdur, təhsil pulsuzdur | Çoxlarının arzusunda olan bu ölkədə həyat necədir?

“Oralarda necədir?” rubrikasının yeni buraxılışında Bakıdan 3200 kilometr məsafədə, Şimal və Baltik dənizlərinin sahilində yerləşən Danimarkanın paytaxtı Kopenhagendən bəhs edilib.

Bu şəhər haqqındakı ilk məlumatlar XI əsrə aiddir. 1254-cü ildən isə bura şəhər statusu qazanır.

Kopenhagendə qadınların ana olması prosesi tamamilə pulsuzdur. Doğuşdan sonra isə anaya 48 həftəlik məzuniyyət verilir.

Təhsil sistemində müəllim və şagird arasında səmimi münasibət var. Ev tapşırıqları azdır, tapşırıq yerinə yetirilmədikdə uşaqlar danlanmır, IX sinfə qədər qiymətləndirmə aparılmır və məktəbdə həftədə bir dəfə şagirdlər müəllimlərlə birgə yemək bişirirlər.

Şəhərdə özəl universitetlər qadağandır, dövlət ali təhsil müəssisələri pulsuzdur və hər bir tələbəyə aylıq 805 avro (təxminən 1591 manat) təqaüd verilir.

Kopenhagendə ən çox gəlir əldə edən peşə sahibləri həkimlərdir. Hətta vergilər tutulduqdan sonra belə əməkhaqqı 5350 avro civarındadır. Bu bizim pulla 10568 manat edir.

Danimarkada oğlanlar hərbi xidmətə getmək üçün bilet çəkirlər. Kimin bəxtinə əsgərlik düşərsə, o da hərbi xidmətə yollanır. Amma getmək istəməyənlər alternativ olaraq qocalar evində və ya uşaq bağçasında baxıcı kimi işləyə bilərlər.

Danimarka vətəndaşlığını almaq üçün isə ölkədə ən azı 12 il yaşamaq, müvafiq imtahan və yoxlamalardan keçmək tələb olunur.