Fransa döyüş meydanına çevrildi

Fransada pensiya islahatı ilə bağlı etiraz aksiyaları səngimək bilmir.

Belə ki, Nant şəhərində polislə nümayişçilər arasında toqquşma olub, tramvay xətləri boyunca şəhərə od vurulub. Ölkə daxilində 250-dən çox yerdə etiraz aksiyası təşkil edilib. Nümayişçilər tərəfindən daş, şüşə, “Molotov kokteyli” atıldığı və 150 polisin xəsarət aldığı bildirilib.

DİN-in məlumatına görə, aksiyalarda 1 milyon, həmkarlar təşkilatlarının hesablamalarına görə isə 3,5 milyon nəfər iştirak edib. Etirazlara yanğınsöndürənlər və xilasedicilər də qoşulublar. Nümayişçilər avtomobilləri, velosipedləri, zibillikləri və digər yerləri yandırırlar. Qurbanların sayı barədə hələlik məlumat yoxdur. Onlarla nümayişçinin həbs olunduğu bildirilib.

Ölkə sakinləri baş verənləri sosial şəbəkələrdə paylaşaraq Fransanın müharibə zonasına çevrildiyini qeyd ediblər.

Etirazçılar qatar stansiyalarını, Parisdəki Şarl de Qoll Hava Limanını, Neft Emalı Zavodlarını və limanları mühasirəyə alaraq tətillər keçiriblər. Geniş ərazini əhatə edən aksiya nəticəsində regional qatarlar, Paris metrosu və digər böyük şəhərlərdə ictimai nəqliyyat sistemləri sıradan çıxıb. Paris Orli Hava Limanında uçuşların təxminən 30%-i ləğv edilib. Həmçinin Eyfel qülləsi və Versal sarayı tətillər səbəbindən bağlanıb.