Fransa müharibəyə belə hazırlaşır? | Xalq savaşın bir addımlığında

Fransadakı xəstəxanalar ölkə ərazisində yaxın bir vaxtda baş verə biləcək müharibəyə hazırlaşır.

Səhiyyə Nazirliyinin “Le Canard enchaîné” qəzetində yayılan daxili sənədləri narahatlıq doğurub.

“Le Figaro” yazır ki, bu sənədlərdə Müdafiə və Milli Təhlükəsizlik üzrə Baş Katibliyin göstərişi ilə Regional Səhiyyə Agentliklərindən 2026-cı ilin mart ayına qədər "böyük səfərbərliyə" hazır olmaları tələb edilir.

Nazirlik ölkənin arxa cəbhəyə çevriləcəyi və burada həm fransız, həm də xarici yaralı hərbçilərin qəbul ediləcəyi bir ssenarini nəzərdən keçirir.

Avropanın Könüllülər Koalisiyasının Ukraynaya hərbi dəstək verməsi kontekstində bu təlimatlar ciddi suallar doğurur. Belə ki, Rusiyanın NATO ölkələrini işğal etmək istəməsi halında yaralı əsgərlərin mümkün kütləvi axını ilə əlaqədar xəstəxanalara 2026-cı ildə müharibəyə hazırlaşmaq tapşırılıb.

“Bu məktubun Regional Səhiyyə Agentliklərinə göndərilməsi ordu ilə aparılan “birgə işin” tərkib hissəsidir. Məqsəd əhalinin sağlamlıq ehtiyaclarını qabaqcadan görmək, buna hazırlaşmaq və cavab verməklə yanaşı, müdafiə sahəsindəki spesifik ehtiyacları da səhiyyə sisteminə daxil etməkdir”, – deyə Səhiyyə Nazirliyi bildirir.