Gürcüstan DTX-dən xüsusi əməliyyat | Dünya bu xəbərdən danışır!

Gürcüstanda 3 milyon ABŞ dolları dəyərində radioaktiv uran ələ keçirilib.

Belə ki, Əks-kəşfiyyat və Xüsusi Əməliyyatlar departamentlərinin əməkdaşları Batumi şəhərində keçirdikləri birgə əməliyyat tədbirləri zamanı radioaktiv kimyəvi element olan uranın qanunsuz dövriyyəsi və satışı faktı üzrə iki nəfəri saxlayıblar. Saxlanılan şəxslərdən biri Gürcüstan vətəndaşı, digəri isə əcnəbi olub.

Dövlət Təhlükəsizliyi Xidmətinin yaydığı məlumata əsasən, sözügedən nüvə materialı alfa və qamma şüalanmasının yüksək dozalarına malikdir və müxtəlif partlayıcı qurğuların hazırlanması, terror aktlarının həyata keçirilməsi və eləcə də kütləvi insan tələfatına səbəb ola biləcək məqsədlər üçün istifadə oluna bilər.

“Dövlət Təhlükəsizliyi Xidməti tərəfindən keçirilən əməliyyatla transmilli cinayət fəaliyyətinin, həmçinin gələcəkdə baş verə biləcək təhlükəli hadisələrin qarşısının alınmasına nail olunub.

Faktla bağlı Gürcüstan Cinayət Məcəlləsinin 230-cu maddəsinin birinci hissəsi üzrə cinayət işi açılıb. Həmin maddə üzrə təqsirli şəxsləri 5 ildən 10 ilədək azadlıqdan məhrumetmə cəzası gözləyir”, ‒ deyə Gürcüstan DTX-nin Terrorizmlə Mübarizə Mərkəzinin rəhbəri Baça Mqeladze bildirib.

Qeyd edək ki, saxlanılan əcnəbi şəxsin vətəndaşlığı ilə bağlı heç bir məlumat verilməyib.