Gürcüstanın sabiq baş naziri Giorgi Qaxariyanı 13 illik həbs gözləyir?

Gürcüstanın 3-cü prezidenti olmuş Mixeil Saakaşvili 2021-ci il oktyabrın 1-də tutulsa da, həbsxanada 6 aydan az vaxt keçirib. Buna səbəb onun səhhəti ilə bağlı klinikalara yerləşdirilməsidir.

Noyabrın 12-də onu “VivaMedi” Xəstəxanasından Rustavidəki həbsxanaya köçürüblər. Bu barədə Gürcüstan Ədliyyə Nazirliyinin Xüsusi Penitensiar Xidməti məlumat yayıb.

"Məhkumun sağlamlığı qənaətbəxş olduğu üçün stasionar müalicəyə ehtiyac duymur. Bu səbəbdən Mixeil Saakaşvili mülki sektora aid klinikadan penitensiar müəssisəyə köçürülüb və cəzasının qalan hissəsini çəkəcək", ‒ deyə məlumatda qeyd olunub.

Qeyd edək ki, Tbilisidəki “VivaMedi”dən əvvəl Saakaşvili həbsxananın xəstəxanası və Qori Hərbi Hospitalında da müalicə alıb. O, 4 cinayət işi üzrə 12 il yarım həbs cəzasına məhkum edilib.

Saakaşvili deputat Valeri Qelaşvilinin döyülməsi, bank əməkdaşı Sandro Qirqvilianinin qətlinə görə tutulanların əfv edilməsi, dövlət vəsaitinin xərclənməsi və sərhədi qanunsuz keçməkdə günahlandırılır.

Bu arada, Gürcüstanın sabiq baş naziri Giorgi Qaxariya 13 illik həbs oluna bilər. O, daxili işlər naziri olarkən vəzifə səlahiyyətlərini aşma və sağlamlığa ciddi ziyan vurmağın təşkilində ittiham olunur.

Qeyd edək ki, Giorgi Qaxariya 2025-ci ilin iyununda Gürcüstanı tərk edib və Almaniyada sığınacaq tapıb. Beynəlxalq qanunvericiliyə görə, Almaniya onu ekstradisiya etməyəcək və Qaxariyanın həbsi yalnız Gürcüstana qayıtsa, mümkünləşəcək.