Harrisə yerində cavab verən Tramp amerikalılardan nə istədi?
Yaxın Şərqdə vəziyyətin stabilləşməsi ABŞ administrasiyasının prioritetlərindən biridir.
Bunu ABŞ prezidentliyə namizəd Kamala Harris deyib.
“Bir neçə saat əvvəl mən Prezident Co Bayden və milli təhlükəsizlik komandamızla uzun və vacib söhbəti bitirdim. Əlbəttə, biz İsrailin özünümüdafiə hüququnu dəstəkləməyin vacib olduğuna inanırıq. Biz həm də qəti şəkildə inanırıq ki, gələcəkdə regionda deskalasiyaya nail olmalıyıq və bu bizim prioritetimiz olacaq”, – deyə o, İsrailin İrana zərbələrini şərh edərkən bildirib.
K.Harris daha sonra sözlərinə belə davam edib:
“Biz bu müharibəni bitirmək üçün çalışmaq istəyirik. Bu müharibə bitməlidir. Biz girovları azad etməliyik. Biz həmçinin 2 dövlətli həll yolunda çalışırıq”.
ABŞ-də prezidentliyə digər namizəd Donald Tramp isə Ağ Evə qayıdacağı təqdirdə qoşunları xarici ölkələrə münaqişələrdə iştirak etmək üçün göndərməyəcəyinə söz verib:
“Mənim nəzarətim altında Birləşmiş Ştatlar müharibə aparmayıb. Biz güc yolu ilə sülhə nail olduq. Bu, çox gözəldir. Siz heç vaxt eşitmədiyiniz bir ölkə uğruna uşaqlarınızı partlatmaq üçün müharibəyə göndərməməlisiniz. Mən sizi sonu olmayan axmaq xarici müharibələrdə vuruşmağa və ölməyə göndərməyəcəyəm”.
D.Tramp həmçinin əmindir ki, demokratların namizədi Kamala Harris qalib gəlsə, amerikalılar xarici münaqişələrə cəlb olunacaqlar:
“O bizi üçüncü dünya müharibəsinə sürükləyəcək. Çünki o, çox bacarıqsızdır. Bütün oğullarınız və qızlarınız heç eşitmədiyiniz bir ölkədə döyüşə göndəriləcək, düşmənlərimiz ona gülür, bizə gülürlər”.