Həmişə onlara xatırladıram ki... | Japarov qalmaqallı hadisədən danışdı

Qırğızıstan Prezidenti Sadır Japarov qardaşı qızı Lazzat Nurkojoyevanın Fövqəladə Hallar Nazirliyinin helikopterindən istifadə etməsinə münasibət bildirib.

24.kg xəbər verir ki, dövlət başçısının bacısı qızının sevgilisi ilə birlikdə FHN-in helikopterindən istifadə edərək ailə tədbirinin keçirildiyi Oruu-Say dərəsinə uçduğunu göstərən video cəmiyyətdə rezonans doğurub.

Sosial şəbəkə istifadəçiləri qeyd ediblər ki, ölkə rəhbərlərinin qohumları və dostları başqalarına nümunə olmalıdır.

Baş verən hadisəyə reaksiya vermək məcburiyyətində qalan Sadır Japarov bildirib ki, Lazzat Nurkojoyevanın gələcək əri Prezidentin israfçılığın qadağan edilməsi təşəbbüsünü dəstəkləməli idi.

“Düz deyirsiniz, ölkə rəhbərliyinin qohumları başqalarına nümunə olmalıdır. Mən dəfələrlə demişəm ki, israfçılığı dayandırmaq lazımdır. Ən azı gələcək kürəkən bu təşəbbüsü dəstəkləməli, həm məni, həm də özünü cəmiyyətin tənqid hədəfi etməzdən əvvəl düşünməli idi. Düşünürəm ki, o, gənc olduğu üçün bunu edib”, – Sadır Japarov “Kabar” agentliyinə deyib.

O əlavə edib ki, Qırğızıstanın Fövqəladə Hallar Nazirliyi yeni helikopterlər alıb.

“Biz helikopterlərin kommersiya məqsədləri üçün istismarına icazə vermişik. İstənilən şəxs icarəyə götürə bilər və buradan gələn hər bir qəpik dövlət büdcəsinə daxil olmalıdır ki, biz gələcəkdə yeni helikopterlər ala bilək. Beləliklə, helikopter parkı mütəmadi olaraq yenilənəcək”, – Sadır Japarov bildirib.

Sadır Japarov onu da vurğulayıb ki, qohumları, qardaşları, bacıları və onların övladları qarşısında ciddi tələblər qoyub:

“Mən həmişə onlara xatırladıram ki, əvvəlki rəhbərlərin səhvlərini təkrarlamağa ehtiyac yoxdur və dövlət işlərinə qarışmamalarını xahiş edirəm”.

Prezident bacısı qızının hərəkəti üçün üzr istəyib:

“Əvvəllər başqalarını tənqid edirdim, amma indi özüm buna məruz qalıram. Bacım qızına görə xalqdan üzr istəyirəm, o, hələ gəncdir, cəmiyyətdən də tənqid görür. Ümid edirəm ki, o, düzgün nəticə çıxaracaq”.