“Hizbullah” yeraltı bunkerdə görün nələr gizlədib... Haqaridən mühüm açıqlama

İsraillə Livan arasında gərginlik səngimək bilmir. “Hizbullah” liderlərinin zərərsizləşdirilməsi bu silahlı qruplaşmanın fəaliyyətini səngitməyib.

İsrail Müdafiə Qüvvələrinin rəsmi nümayəndəsi Daniel Haqari isə ilk olaraq yerli televiziya kanalları vasitəsilə xalqa müraciət ünvanlayıb və bildirib ki, Beyrutdakı xəstəxanalardan birinin altında “Hizbullah” təşkilatının yeraltı bunkerinin olduğu güman edilir:

“Orada təxminən yarım milyard dollar dəyərində nağd pul və qiymətli əşyalar saxlanılır. Hərbçilərin fərziyyəsinə görə, bu bunker Dahiya ətrafındakı “As-Sahel” xəstəxanasının binasının altında yerləşir və “Hizbullah”ın keçmiş lideri Həsən Nəsrullah tərəfindən istifadə edilib.

Sözügedən obyekt uzunmüddətli qalmaq və döyüş əməliyyatlarına rəhbərlik etmək üçün uyğunlaşdırılıb. Bu pullar yerli sakinlərin çətinliklərlə mübarizəsinə xərclənə bilərdi. Amma onlar pulları “Hizbullah” təşkilatının silahlanması üçün ayırdılar. Bu vəsaiti toplamaqda başqa məqsəd yox idi”.

Daha sonra isə onun yeni videosu paylaşılıb. Bu dəfə İsrail Müdafiə Qüvvələri sözügedən tunellərdən birində ən böyüyünü aşkar etdiyini etiraf ediblər.

Hadisə yerindən məlumat verən Daniel Haqari bildirib ki, İsrail Quru Qoşunları Livanın cənubunda 800 metrlik yeraltı keçiddədirlər.

“Bu tunel və onun içindəkilər burada olmamalı idi. BMT-nin 1701 saylı qətnaməsinə əsasən, bunun qarşısı alınmalı idi. Biz bu əraziyə həmin qətnamənin şərtlərini təmin edə bilmək üçün gəlmişik. Ona görə də “Hizbullah” heç vaxt bu cür infrastruktura malik olaraq İsraillə sərhəddə mövcud ola bilməz.

“Qalileyi fəth et” planı üzrə irəlilədik. “Hizbullah” lideri olan H.Nəsrullahın öldürülməsi bütün dünyaya sakitlik bəxş etdi. Biz Qəzzada amansız şəraitdə saxlanılan 101 girovu geri qaytarmaq üçün də əlimizdən gələni edəcəyik. Bu tunel indi aşkar edilməsə idi, onlar bizim ərazilərimizə hücum edəcəkdilər”, – deyə D.Haqari qeyd edib.