İndi müharibə daha şiddətli olacaq! | Ukrayna ordunu necə gücləndirir?

Ukrayna Prezidenti Volodimir Zelenskinin əcnəbi zabitlərin Ukrayna Ordusunda xidmətinə icazə ilə bağlı qanuna dəyişiklik qərarı Ali Radada sürətlə qəbul edildi.

Qərarın mahiyyətində hansı ölkələrdən və hansı statusda əcnəbi hərbçilərin cəlb ediləcəyi açıqlanmasa da, onların Qərbdən gələcəyi xəbərləri dolaşır.

Ali Radanın hakim “Xalqın xidmətçisi” partiyasından olan deputatı Yuri Kamelçuk Baku TV-nin Şərqi Avropa bürosuna bildirib ki, məqsəd Ukrayna Ordusunda son vaxtlar çatışmayan komandir heyətinin təmin edilməsidir.

“Ali Rada tərəfindən səsə qoyulan və prezidentin imzalanan xarici hərbi mütəxəssislərin Ukrayna Silahlı Qüvvələrinə cəlb edilməsi haqqında qanun zabitlərin Rusiyaya qarşı müharibədə xidmətə cəlb edilməsi üçün imkanlar açır. Bu isə o deməkdir ki, Ukrayna Silahlı Qüvvələrini gücləndirəcək təcrübəli komandirlər olacaq. Təəssüf ki, etiraf etməliyik ki, müharibə bir çox ukraynalı zabit və komandirlərimizin həyatına son qoydu. Biz onların sıralarını artırmalıyıq. Əgər söhbət zabit korpusundan gedirsə, bu, artıq uzun illər təcrübəsi olan və Ukraynaya gətirilən təyyarələrdə döyüş tapşırıqlarını yerinə yetirə bilən xarici pilotlara da aiddir”, – deputat əlavə edib.

Hərbi analitik Svetlana Kuşnir vurğulayıb ki, hazırda Ukrayna Qərb koalisiyasının dəstəyinə çox ehtiyac duyur: “Əgər əvvəllər koalisiya bizə silahlanma və texniki məlumat mübadiləsi şəklində kömək edirdisə, indi hərbi qüvvələrlə dəstək, təbii ki, müdafiə olunmağımıza kömək edəcək”.

Qeyd edək ki, son zamanlar Ukrayna Ordusu cəbhədə, xüsusilə Donbas istiqamətində ciddi geriləməyə məruz qalıb.