İnsanın əhvalını yaxşılaşdıran maddələr aşkarlandı

Alimlər beyində davranışa təsir edən mexanizmi aşkarlayıblar.

İsrail və ABŞ alimlərindən ibarət beynəlxalq tədqiqat qrupu beynin əhvali-ruhiyyə və davranışa təsir edən kimyəvi mexanizmləri ilə bağlı mühüm kəşfə imza atıblar.

İsrail mediasında yayılan xəbərə görə, alimlər beyindəki bəzi hüceyrələrin insanın həm davranışına, həm də əhvalına təsir edən maddələrin – dopamin və serotoninin ifrazını idarə etdiyini müəyyənləşdiriblər.

Məlumata görə, bu hüceyrələrin həddindən artıq aktivliyi obsesif-kompulsiv pozuntu və depressiya kimi hallarda davranışların nəzarətdən çıxmasına səbəb ola bilər.

Qeyd edilir ki, bu kəşf gələcəkdə daha dəqiq və hədəflənmiş müalicə üsullarının hazırlanmasına imkan yarada bilər. Belə ki, yeni yanaşmalar mövcud dərmanlardan fərqli olaraq, beynin kimyəvi siqnallarını daha incə şəkildə tənzimləməyə yönələcək.

Bundan əlavə, tədqiqatın nəticələri fərdiləşdirilmiş müalicə planlarının hazırlanmasına və terapiya üsullarının daha effektiv tətbiqinə şərait yarada bilər.