İran 52 min nəfərə görə kompensasiya ödəməlidir | Tramp göstəriş verdi

Vaşinqton administrasiyası tərəflər arasındakı münaqişə zamanı insanların ölməsinə və yaralanmasına, eləcə də İran Silahlı Qüvvələrinin zərbələri nəticəsində ABŞ-yə dəyən ziyana görə Tehrandan kompensasiya tələb edir.

Bu barədə ABŞ Prezidenti Donald Tramp "Truth Social" hesabında yazıb.

Məlumata görə, İran tərəfi daha əvvəl son beş aylıq hərbi münaqişə zamanı ölkəsinə dəyən ziyana görə kompensasiya ödənilməsini istəyib. ABŞ lideri isə kompensasiya məsələsini maraqlı ideya adlandırıb və bu məsələnin daha əvvəl İranla danışıqlarda müzakirə olunmadığını bildirib.

"Bu çox maraqlı ideyadır, ona görə mən də indi yol kənarına qoyulmuş bombalar və digər münaqişələr nəticəsində öldürülən və ya ağır yaralanan şəxslərə, o cümlədən general Qasım Süleymaninin ilkin rəhbərliyi dövründə törədilən hadisələrə görə təzminat tələb edirəm.

Siyahıya həmçinin "USS Cole" gəmisinin göyərtəsində həlak olanların ailələri və döyüş əməliyyatlarında həlak olmuş minlərlə digər insan daxildir. Həmçinin son 50 il ərzində İranda baş verən etiraz aksiyaları zamanı həlak olanların ailələri üçün də kompensasiya tələb edirəm. Mən nümayəndələrimə tapşırmışam ki, bu məsələni qətiyyətlə bütün gələcək danışıqlara daxil etsinlər", – deyə ABŞ lideri vurğulayıb.