İran-ABŞ qarşıdurması nəzarətdən çıxır: Bölgədə gərginlik pik həddə - Baku TV

ABŞ Mərkəzi Komandanlığı İrana növbəti hücum dalğasını həyata keçirib.

CENTCOM zərbələrin sahil müdafiə sistemlərinə, eləcə də Böyük Tonba adasındakı kruiz raketlərinin saxlanması və buraxılış məntəqələrinə endirildiyini açıqlayıb.

Qeyd olunub ki, əməliyyat Hörmüz boğazında ticarət gəmilərinə hücum etmək üçün istifadə edilən İran qüvvələrinin hərbi imkanlarını daha da zəiflətmək məqsədi daşıyır.

SEPAH-ın cavabı özünü çox gözlətməyib. İran İslam İnqilabı Keşikçiləri Korpusu ABŞ-nin Bəhreyn, Küveyt və İordaniyadakı hərbi bazalarına və obyektlərini hədəf alıb.

İrana qarşı dəniz blokadası tətbiq olunandan bəri ABŞ Silahlı Qüvvələri Hörmüz boğazında blokadanı yarmağa çalışan iki ticarət gəmisinin istiqamətini dəyişdirib. Bu barədə ABŞ Silahlı Qüvvələrinin Mərkəzi Komandanlığının "X" sosial şəbəkəsində bildirilib.

"ABŞ Silahlı Qüvvələri sayıqlığını qoruyur və blokadaya tam riayət olunmasını təmin etməyə hazırdır", – deyə CENTCOM-un paylaşımında vurğulanıb.

Bu arada, İranın ali dini liderinin sabiq baş müşaviri Məhəmməd Cavad Laricani maraqlı açıqlama ilə çıxış edib. O, İranı uzunmüddətli müharibəyə hazırlaşmağa çağırıb.

Laricani bəyan edib ki, ölkə üç-dörd il davam edə biləcək mümkün münaqişəyə hazır olmalıdır. Bu səbəbdən İranın iqtisadi və müdafiə hazırlığının gücləndirilməsinin vacibliyini vurğulayıb.