İran atəşkəsdən sonra ilk dəfə İsrailə raket atıb | Yaxın Şərqdə vəziyyət gərginləşdi - Baku TV

İran İsrailə yenidən raket hücumu həyata keçirib.

Bu barədə İsrail Müdafiə Qüvvələri özünün "Telegram" kanalında məlumat verib.

Bildirilir ki, endirilən zərbələrin hədəfi Ramat-David hərbi aviabazası olub.

"Hava hücumundan müdafiə sistemi təhdidləri aşkarlayır və ələ keçirir. Vətəndaşlar da hərbi əmrlərə əməl etməli və zərbələrin nəticələrinin görüntülərini yayımlamamalıdırlar", – deyə məlumatda qeyd olunub.

Əlavə edək ki, sözügedən aviabaza Livan ərazisinə hücumların həyata keçirildiyi məntəqələrdən biri olub.

Bu arada, raket hücumlarının başlandığı ərəfədə ABŞ Prezidenti Donald Tramp İrana xəbərdarlıq edib.

"Mən İrana təklif edirəm ki, raketlərinizi buraxdınız, bəsdir. Danışıqlar masasına qayıdın və razılaşma əldə edin", – deyə Tramp bildirib.

Ağ Ev rəhbəri həmçinin İsrailin Beyruta endirdiyi zərbələrdən də narazı olduğunu qeyd edib.

Əlavə edək ki, İran hakimiyyəti təhlükəsizlik səbəbi ilə ölkənin qərb hissəsində hava məkanını növbəti xəbərdarlığa qədər bağlamaq qərarına gəlib.