İran Hörmüz boğazı ilə bağlı ABŞ-yə xəbərdarlıq etdi - Baku TV

İran Silahlı Qüvvələri ABŞ-yə Hörmüz boğazındakı dəniz blokadası ilə bağlı sərt xəbərdarlıqlar edib.

Bu barədə İran dövlət televiziyası məlumat yayıb.

“Əgər Amerika Ordusu bölgədə mühasirəni və piratçılığı davam etdirərsə, onlar güclü İran Silahlı Qüvvələrinin cavab zərbələri ilə qarşılaşacaqlarına əmin olmalıdırlar. İran Silahlı Qüvvələri ölkənin suverenliyini və ərazi bütövlüyünü təmin etmək üçün əvvəlki dövrlərə nisbətən daha güclü və daha hazırlıqlıdır”, – deyə “Xatəm əl-Ənbiya” Mərkəzi Qərargahının məlumatında bildirilib.

Həmçinin vurğulanıb ki, qarşı tərəfin bütün təxribat xarakterli hərəkətləri yaxından izlənilir.

Bu arada ABŞ Mərkəzi Komandanlığı Oman körfəzində daha bir İran gəmisini ələ keçirdiyini açıqlayıb. Tankerin milyardlarla dollar dəyərində neft və təbii qaz məhsulları daşıdığı vurğulanıb.

CENTCOM blokadanın başlanmasından bəri 37 İran gəmisinin saxlanıldığını və bu blokadanın davam edəcəyini bildirib.