İranın yeraltı anbarlarında böyük raket ehtiyatı saxlanıldığı bildirilir - Baku TV

İran ABŞ-nin endirdiyi zərbələrdən sonra giriş yolları bağlanan 18 iri yeraltı raket bazasına yenidən çıxışı bərpa edə bilib.

Bu barədə CNN telekanalı peyk çəkilişlərinin məlumatlarına istinadən xəbər yayıb.

Qeyd edilib ki, İran tərəfi bu bazaların tunel sistemlərinə aparan 69 girişdən 50-ni təmizləyə bilib.

Mütəxəssislərin fikrincə, bu, İrana yeraltı anbarlardan sursatların operativ çıxarılmasına imkan verir. Nəticədə İsrailə və Yaxın Şərq regionunun digər ölkələrinə çox sayda ballistik raketlə hucuma şərait yaradır.

"Analitiklər hesab edirlər ki, İranın yeraltı anbarlarında təxminən 1000 raket cəmlənib", – deyə telekanal bildirib.

Pentaqonun rəsmi nümayəndəsi Şon Parnell CNN-in jurnalist araşdırmasının nəticələrini şərh etməkdən yayınıb. O, əvvəllər səsləndirilən bəyanatı təkrarlayaraq bildirib ki, ABŞ Silahlı Qüvvələri dünyanın ən döyüşkən ordusudur və qeyd edib ki, Donald Trampın qərarı ilə istənilən vaxt, dünyanın istənilən nöqtəsində tapşırıqları yerinə yetirmək üçün bütün lazımi vasitələrə malikdir.