İŞİD-in "yüksəkrütbəli" komandiri saxlanıldı

Suriya Demokratik Qüvvələrinin silahlıları əldə olunan razılaşmaya zidd olaraq Hələbin Şeyx Maqsud məhəlləsindən çıxmaqdan imtina ediblər.

Bu barədə SANA agentliyi məlumat verib.

Mənbələrin bildirdiyinə görə, SDQ-nin üzvləri onları ərazidən çıxarmağa çalışan təhlükəsizlik qüvvələrinə atəş açıblar. Bundan sonra silahlıların təxliyəsi üçün göndərilən avtobuslar ərazini tərk edib.

Xatırladaq ki, Hələbdə SDQ və Suriya Ordusu arasındakı toqquşmalarda ölən mülki şəxslərin sayı 21-ə çatıb, 55 nəfər yaralanıb. 100 mindən çox insan döyüşlərin getdiyi Şeyx Maqsud və Əşrəfiyyədən köç ediblər.

Bu arada Suriyada İŞİD terror təşkilatının “yüksəkrütbəli” komandirlərindən biri ələ keçirilib.

“Haber Global”ın məlumatına görə, həmin şəxs Suriya Daxili İşlər Nazirliyi və Suriya Kəşfiyyat Təşkilatının İŞİD-ə qarşı birgə əməliyyatı zamanı saxlanılıb. Onun şəxsiyyəti barədə açıqlama verilməyib.

Ölkədə vəziyyətin bu cür cərəyan etdiyi bir anda ABŞ-nin Türkiyədəki səfiri və Suriya üzrə nümayəndəsi Tom Barrak təcili Dəməşqə gedib.

Avropa Komissiyasının Prezidenti Ursula Fon der Lyayen və Avropa İttifaqı Şurasının Prezidenti Antonio Koşta da Suriyada səfərdədir.