İsrail Beyruta zərbə endirib | Dörd İran diplomatı həlak olub - Baku TV

İsrail Müdafiə Ordusu Livanda "Hizbullah"ın infrastrukturuna növbəti zərbələr dalğası başladıb.

Bu barədə ordunun mətbuat xidməti sosial şəbəkələrdə məlumat yayıb.

"İsrail Ordusu Beyrutun Dahiyə rayonunda "Hizbullah" hərəkatının infrastrukturuna zərbələr endirməyə başlayıb", – deyə məlumatda bildirilib.

Həmçinin İsrail istiqamətində raket atmağa hazırlanan "Hizbullah" hərəkatının buraxılış qurğularının İsrail Hərbi Hava Qüvvələri tərəfindən məhv edildiyi də qeyd olunub. Bildirilib ki, qurğunun silahlandırılması ilə məşğul olan və buraxılışı həyata keçirməyə çalışan döyüşçülərə zərbələr endirilib.

İsrail Ordusu qeyd edib ki, "Roaring Lion" əməliyyatı başlayandan bəri İsrail ərazisinə atılmağa hazır olan 70-dən çox raket buraxılış qurğusu məhv edilib və zərərsizləşdirilib.

İranın BMT-dəki Daimi Nümayəndəliyi iranın 4 diplomatının Livanda öldürülməsi xəbərini yayıb. Bildirilib ki, İsrailin Livanın paytaxtı Beyruta endirdiyi zərbə nəticəsində İranın dörd diplomatı həlak olub.

Missiyanın məlumatına görə, hadisə martın 8-i səhər saatlarında diplomatların müvəqqəti qaldığı hoteldə baş verib. İran tərəfi vurğulayıb ki, hadisə zamanı diplomatlar Livan ərazisində öz dövlətlərinin rəsmi nümayəndələri kimi xidmətdə olublar.