İsrail Ordusu sərhəddən 10 km aralıda yeni mövqelərə nəzarəti ələ keçirdi

İsrail Müdafiə Ordusu Livanın cənubunda, sərhəddən təxminən 10 km aralıda yerləşən Vadi Saluki üzərində operativ nəzarət qurub.

Bu barədə İsrail Ordusunun mətbuat xidməti məlumat yayıb.

Qeyd olunub ki, 7-ci zirehli tank briqadasının və "Eqoz" bölməsinin hərbi qulluqçuları operativ nəzarətin qurulması və Saluki çayı hövzəsinin şimalındakı ərazinin "Hizbullah" infrastrukturundan təmizlənməsi üzrə əməliyyatı başa çatdırıblar.

"Bu əməliyyat Livanın cənubunda operativ nəzarətin gücləndirilməsi və Qalileya, Metula yaşayış məntəqələri üçün birbaşa təhlükənin aradan qaldırılması səylərinin bir hissəsidir", – deyə bəyanatda bildirilib.

İsrail Müdafiə Ordusu iddia edir ki, "Hizbullah" qruplaşması Saluki yaxınlığındakı ərazidə partlayıcılı dronların buraxılması və bu rayonda fəaliyyət göstərən İsrail qoşunlarının raket atəşinə tutulması üçün infrastruktur yerləşdirir.

Vurğulanıb ki, əməliyyat zamanı quru qoşunları və İsrail Hərbi Hava Qüvvələri "Hizbullah"ın yüzlərlə obyektini məhv edib, həmçinin qruplaşmanın 50-dən çox üzvünü zərərsizləşdirib.

Bundan əlavə, silahlar, o cümlədən tank əleyhinə raketlər və partlayıcı maddələr müsadirə edilib.