Yaxın Şərqdə gərginlik artır | "Hizbullah"a məxsus qərargah dəqiq zərbə ilə vuruldu - Baku TV

İsrail Müdafiə Ordusu Livanda radikal “Hizbullah” qruplaşmasının artilleriya qərargahını məhv edib.

Bu barədə Ordunun mətbuat xidməti məlumat yayıb.

Bildirilib ki, İsrail Müdafiə Ordusu Livanın cənubunda “Hizbullah” təşkilatının artilleriya qərargahına hücum edərək onu məhv edib. Hücumdan sonra binanın daxilində silahların olduğunu göstərən təkrar partlayışlar qeydə alınıb.

Xəbərdə qeyd olunub ki, zərbə rayonda terrorçu qruplaşmaların olması barədə məlumat daxil olduqdan sonra endirilib.

İsrail Ordusu həmçinin Livandan İsrail istiqamətinə raketlərin atıldığını, onlardan bəzilərinin zərərsizləşdirildiyini, digərlərinin isə heç bir ziyan vurmadan boş ərazilərə düşdüyünü bildirib.

Ordudan o da qeyd olunub ki, “Hizbullah” hərəkatının, xüsusilə İsrailin şimalına yönələn zərbələri intensivləşdirə biləcəyi ehtimalına qarşı hazırlıq görülür.

Bəyanatda vurğulanıb ki, İsrail Ordusunun Livanın cənubundakı əməliyyatlarını genişləndirməsindən sonra mövcud vəziyyətin qiymətləndirilməsinə uyğun olaraq Livan ərazisindən törədilə biləcək mümkün zərbələrə, xüsusilə ölkənin şimal bölgələrinə qarşı hazırlıq işləri aparılır.