İsraildə sensasiya yaradan “Qeysəriyyə əməliyyatı” | Yeni liderin ilk müraciəti

“Hizbullah”ın yeni baş katibi Naim Qasım çərşənbə günü təşkilatın lideri kimi ilk televiziya müraciətini edib. Bu barədə “Yerusəlim Post” yazıb.

N.Qasım çıxışı zamanı qurumun əvvəlki lideri Həsən Nəsrullahın yolunu davam etdirmək niyyətində olduğunu elan edib.

O, İsrail Baş naziri Benyamin Netanyahunun Qeysəriyyədəki evinə pilotsuz təyyarə hücumuna da toxunub:

“Netanyahu bu dəfə sağ qaldı, bəlkə də onun vaxtı hələ gəlməyib. Mənim gündəliyim bütün aspektlərdə Nəsrullahın gündəmini izləməkdir. Biz müharibə planımızı davam etdirəcəyik. Biz heç kimin adından və ya kiminsə layihəsi üçün mübarizə aparmırıq, Livan üçün mübarizə aparırıq. İran bizim layihəmizi dəstəkləyir və bizdən heç nə tələb etmir”.

N.Qasım sentyabr və oktyabr aylarında İsrailin zərbələri nəticəsində öldürülən “Hizbullah”ın keçmiş liderləri – Həsən Nəsrullah və Haşim Səfiəddini, HƏMAS-ın keçmiş rəhbəri Yəhya Sinvarı yad edib:

“Sinvar Fələstin və dünyanın azad xalqı üçün qəhrəmanlıq və müqavimət simvoludur, son nəfəsinə qədər döyüşərək həlak oldu – mətanətli, cəsur, sadiq, saleh, şərəfli və azad insan idi”.

O vurğulayıb ki, “Hizbullah” HƏMAS-a dəstəyini davam etdirəcək və İsrailin bütün bölgə üçün yaratdığı təhlükə ilə mübarizə aparacaq.

“Hizbullah” lideri ABŞ və Avropa da daxil olmaqla İsraili dəstəkləyən ölkələri tənqid edib.