İsrailin hava hücumları 1,38 milyard dollar ziyan vurub

İsrailin hava hücumları Livanın cənubundakı mənzillərə 1,38 milyard dollar birbaşa ziyan vurub.

Bu barədə BMT-nin İnkişaf Proqramının hesabatında qeyd olunub.

"İsrailin hücumları səbəbindən Livanın cənubunda 11 095 bina tamamilə dağıdılıb, 2242 bina qismən zədələnib, 5219 bina isə kiçik ziyan görüb", – deyə hesabatda bildirilir.

Sosial İşlər Nazirliyinin məlumatına görə, Livanda hərbi əməliyyatlar səbəbindən didərgin düşənlərin sayı 963 497 nəfərə çatıb ki, bu da ümumi əhalinin 16%-ni təşkil edir. 160 000-dən çox vətəndaş isə tamamilə evsiz qalıb.

Bu arada, ABŞ-nin vitse-prezidenti Cey Di Vens bildirib ki, Livanda atəşkəslə bağlı irəliləyiş əldə olunub. O, İsrailin özünümüdafiə haqqını vurğulayaraq, "Hizbullah"ın hədəfə alınmasına bəraət qazandırıb.

"Əlbəttə ki, İsrail buna cavab verməlidir. Amma bu hücumlara Livan, İsrail və "Hizbullah" arasında gedən danışıqlar nəzərə alınaraq, cavab verilsə, vəziyyət daha dinc olar. Ötən 24 saat bəlkə də Livanın gördüyü ən dinc durum idi, üç sutka əvvəl orada atışmalar baş verirdi. Beləliklə, tədricən irəliləyiş əldə olunur", – deyə Vens bildirib.

O, İsrailin Livan ərazisini ələ keçirmək niyyətində olmadığını, sadəcə özünü cənubi Livanda olan "Hizbullah" döyüşçülərindən qorumağa çalışdığını vurğulayıb.

"Düşünürəm ki, həm Livanın ərazi bütövlüyünü qoruya, həm də İsrailin təhlükəsizliyini təmin edə bilərik", – deyə Vens əlavə edib.