İsrailin hədəfi hara idi? | İranın hərbi obyektləri vurulub - Baku TV

İsrailin Hərbi Hava Qüvvələri İranın paytaxtı Tehrana növbəti aviazərbələr endirməyə başlayıb.

Bununla bağlı bəyanat İsrail Müdafiə Qüvvələri tərəfindən verilib.

Bəyanatda qeyd olunub ki, hücumun hədəfi şəhərdə yerləşən hökumət binaları olub.

Bundan qısa müddət sonra İranın "Tasnim" agentliyi Tehranın bir sıra rayonlarında silsilə partlayışların olduğunu təsdiqləyib. Şəhərdə hava hücumundan müdafiə sistemlərinin atış səsləri eşidilib.

Nəşrin məlumatına görə, partlayışlar Tehranın mərkəzi və şimal hissələrində qeydə alınıb.

Qeyd edək ki, İsrail Müdafiə Qüvvələri martın 13-də İsrail Hərbi Hava Qüvvələrinin İranın mərkəzi və qərb bölgələrində 150 hərbi obyektə zərbələr endirdiyini açıqlayıb. Hədəflər arasında silah anbarları, onlarla ballistik raket və buraxılış qurğuları, pilotsuz uçuş aparatlarının saxlanıldığı anbarlar, hava hücumundan müdafiə sistemləri və silah istehsalı obyektləri olduğu bildirilib.

Bundan əlavə, ABŞ və İsrail tərəfindən həyata keçirilən hərbi əməliyyat nəticəsində İran ərazisində azı 9669 mülki infrastruktur obyekti, o cümlədən 7943 yaşayış binası zərər görüb.