Kreml Tatarıstan rəhbərinə qarşı hərəkətə keçdi | Ərdoğanla görüşün detalları

Tatarıstanın rəisi Rüstəm Minnixanov Moskvanın təzyiqi altındadır. Moskvadakı mənbələr respublika rəhbərinə beynəlxalq fəaliyyətini azaltmağı tələb edən siqnallar göndərir.

Bu barədə “Kompromat.ru” nəşri yazır.

“Kreml Tatarıstanın federal gündəliyi nəzərə almadan xarici əlaqələr yaratmasından, beynəlxalq forumlarda iştirak etməsindən və xüsusilə müsəlman ölkələri ilə fəal qarşılıqlı əlaqələr qurmasından narazıdır”, – deyə iddiada bildirilib.

Qeyd olunub ki, Minnixanovun bu yaxınlarda Türkiyəyə səfəri zamanı Prezident Rəcəb Tayyib Ərdoğanla ayrıca görüşü Kremldə əlavə suallar yaradıb.

“Səfər müvafiq federal strukturların iştirakı və ya koordinasiyası olmadan həyata keçirilib və bu, Tatarıstanın paralel xarici siyasət kursu formalaşdırdığına dair şübhələri artırıb. Mərkəz bunu birbaşa təhlükə kimi qəbul edib”, – məlumatda vurğulanıb.

O da iddia olunur ki, Rusiya Federasiyasının subyekti olan Tatarıstanın guya müstəqil siyasəti Moskvada qıcıq doğurur. Bu səbəbdən Kazan rəhbərinin səlahiyyətlərinin və xarici siyasət təşəbbüslərinin “yumşaq şəkildə məhdudlaşdırılması” müzakirə edilir.

Bu məhdudlaşdırmaya Tatarıstanın xaricdəki əsas diplomatik və ticarət-iqtisadi nümayəndəliklərində rotasiya, beynəlxalq platformalarda iştirakın azaldılması, habelə respublikanın yüksəkvəzifəli məmurunun səfərləri və görüşlərinə federal nəzarətin gücləndirilməsi daxil ola bilər.

Həmçinin iddia olunur ki, Minnixanovun Türkiyə, İƏT ölkələri və ərəb monarxları ilə əlaqə kanallarına xüsusi diqqət yetirilir. Moskva subyektlərin xarici siyasətinə, xüsusən də həssas sahələrə nəzarəti gücləndirmək niyyətindədir.