Küçələrdə dəhşətli hücumların əsl səbəbi | Ərdoğandan təcili açıqlama

Suriyanın şimalında bir qrup şəxs Türkiyə bayrağını yandırıb, avtomobilləri atəşə tutub.

Buna cavab olaraq Şanlıurfada insanlar suriyalıların mağaza və evlərinə daşlarla hücum ediblər. Etirazçılar həmçinin Suriyaya keçmək üçün Öncüpınar sərhəd qapısına toplaşmağa da başlayıblar.

Bu arada ölkənin Xarici İşlər Nazirliyi Kayseri bölgəsində baş verən hadisələrdən sonra Suriyada həyata keçirilən təxribat aktları ilə bağlı bəyanat yayıb.

Bildirilib ki, rəsmi Ankaranın Suriya xalqının rifahı üçün göstərdiyi səyləri və prinsipial mövqeyi hər hansı təxribatdan üstün olub.

“Türkiyənin qanuni tədbir gördüyü bir cinayətin ardınca Kayseridə baş verən kədərli hadisələri sərhədlərimizdən kənarda təxribatlara əsas kimi istifadə etmək düzgün deyil", – deyə bəyanatda qeyd olunub.

Bu açıqlamanın fonunda Türkiyənin Milli Kəşfiyyat Təşkilatı Suriyadakı vəziyyətin nəzarətə götürülməsi məqsədilə hərəkətə keçib.

Məlumat üçün bildirək ki, etirazlara Kayseri bölgəsində Suriya əsilli bir şəxsin azyaşlını cinsi qısnamaya məruz qoyması ilə bağlı yayılan xəbərlər səbəb olub. Bu hadisədən sonra sakinlər bölgədə yaşayan suriyalıların evlərinə və maşınlarına ziyan vurmağa başlayıb. Vəziyyət o həddə çatıb ki, əraziyə polis əməkdaşları cəlb olunub. Qeyd edək ki, hazırda sözügedən şəxs saxlanılıb.