Livan-İsrail gərginliyi pik həddə | Xeyli sayda ölən və yaralanan var

Livanın Baş naziri Nəcib Mikati ölkəsinin beynəlxalq qanunlara riayət edərək İsrailin hücum təhlükəsinə qarşı özünü hər cür müdafiə edəcəyini deyib.

Bu barədə yerli mediada məlumatlar paylaşılıb. Mikati dinc əhaliyə qarşı hər cür zorakılığı pislədiklərini vurğulayaraq, İsrailin Livanın cənubuna hücumlarının dayandırılmasını və BMT-nin Təhlükəsizlik Şurasının 1701 saylı qətnaməsinin həyata keçirilməsini dünya birliyindən tələb edib.

İsrail tərəfi isə Qolan təpələrinə atılan raketlərin və 12 nəfərin ölümünün intiqamını almağa davam edir. Belə ki, İsrail hava qüvvələrinin ötən gecə ərzində Livanın Beyrut şəhərinə atdığı raketlərin sayı 7-yə çatıb. Aviazərbələr nəticəsində 3 nəfər həlak olub, 69 nəfərin isə yaralandığı bildirilib.

Livanın cənubundakı Cebçit kəndinə də raketlər atılıb. Nəticədə beş livanlı yaralanıb. Onlardan ikisinin vəziyyətinin ağır olduğu bildirilir. 20-dən çox ev darmadağın edilib.

Xatırladaq ki, Livan-İsrail sərhədində gərginlik 2023-cü il oktyabrın 8-dən artıb. Buna səbəb HƏMAS-ın İsrailə hücumuna “Hizbullah”ın dəstək verməsi olub.