Liviyanın rəhbərliyinə namizəd olan Aişə Qəddafi sorğuda birinci olub

Liviyanın keçmiş lideri Müəmmər Qəddafinin qızı Aişə Qəddafi qeyri-rəsmi sorğuda birinci olub.

Sorğu ölkənin gələcək lideri üçün ən arzuolunan namizədin müəyyənləşdirilməsi məqsədilə keçirilib.

“Al Hadath”ın məlumatına görə, sentyabrda keçirilən səsvermədə 549 mindən çox insan iştirak edib. Onlardan 141 502-si Aişə Qəddafiyə səs verib. O, ən yaxın rəqibini 30 mindən çox səslə qabaqlayıb.

Təşkilatçılar səsvermənin qeyri-rəsmi olduğunu bildiriblər. Onların sözlərinə görə, bu, seçki və ya referendum olmayıb.

Bununla yanaşı, Qəddafinin tərəfdarları Aişəni hərəkatın rəhbərliyinə çağırıblar. Bu çağırışlar onun qardaşı Seyf əl-İslam Qəddafinin ölümündən sonra səsləndirilib.

“Fezzan qadınları” təşkilatı Aişə Qəddafinin namizədliyini dəstəklədiyini açıqlayıb. “Xalq Milli Hərəkatı” isə onu keçmiş rejim tərəfdarlarının yeni lideri kimi tanıdığını bildirib.

Qəbilələr Ali Şurasının üzvü Əşrəf Abdel Fəttah deyib ki, keçmiş rejimin tərəfdarlarının böyük hissəsi Aişəni uyğun namizəd hesab edir. O əlavə edib ki, son qərarı Aişə Qəddafinin özü verməlidir.