London polisi Starmerin ofisinin əməkdaşlarını niyə dindirəcək?

London polisi Böyük Britaniyanın Baş naziri Kir Starmerin ofisinin əməkdaşlarını dindirməyə hazırlaşır.

"The Telegraph" xəbər verir ki, istintaq Starmerin keçmiş aparat rəhbəri Morqan Maksvininin telefonunun oğurlanması ilə bağlı aparılır.

Məlumata görə, 2025-ci ilin oktyabrında naməlum şəxs Maksvinin smartfonunu elektrik velosipedində yaxınlaşaraq ələ keçirib. Bildirilir ki, cihazda Böyük Britaniyanın ABŞ-dəki sabiq səfiri Piter Mandelsonla bağlı qalmaqala dair məlumatlar ola bilərdi.

Qeyd olunur ki, hadisədən sonra Maksvini telefonun yerini müəyyənləşdirmək üçün Dauninq-strit əməkdaşlarına müraciət edib. Daha sonra təhlükəsizlik xidməti cihazdakı məlumatları uzaqdan silib.

Nəşrin məlumatına görə, Maksvini polisə zəng edərkən hadisənin baş verdiyi ünvanı yanlış göstərib. Bunun səbəbi açıqlanmır.

Bildirilib ki, yenidən başlanmış araşdırma çərçivəsində hüquq-mühafizə orqanları hökumətin cihazın yerini izləmək imkanlarının olub-olmadığını araşdırır. Eyni zamanda, məlumatların tamamilə itirildiyi ehtimalı da nəzərdən keçirilir.

Qəzet yazır ki, müxalifət bu işdə bəzi məlumatların gizlədilməsindən ehtiyat edir və qalmaqalın Starmerin siyasi mövqeyinə mənfi təsir göstərə biləcəyi qeyd olunur.