Yura dövrünün nəhəng okean canlıları nümayiş etdilir

Londonun Təbiət Tarixi Muzeyində “Yura dövrünün okeanları: Dərinliklərin canavarları” adlı sərgi açılıb.

Sərgidə 200 milyon il əvvəl okeanlarda yaşamış nəhəng dəniz canlıları təqdim edilir.

Muzeyin sərgi meneceri Keyt Vitinqton bildirib ki, sərgi Yura dövrünün okean həyatını ziyarətçilərə yaxından tanıtmağı hədəfləyir.

Onun sözlərinə görə, həmin dövrdə dənizlərdə ixtiozavrlar, plesiozavrlar və mozazavrlar kimi iri yırtıcılar hökm sürürdü. Vitinqton qeyd edib ki, bu canlılar o qədər təhlükəli idi ki, həmin dövrdə suya daxil olmaq belə riskli hesab oluna bilərdi.

O əlavə edib ki, sərgi yalnız qədim dəniz yırtıcılarını deyil, həm də bugünkü okean ekosistemlərinin əhəmiyyətini vurğulayır.

Sərgidə ixtiozavr, plesiozavr və mozazavr qalıqları ilə yanaşı, Yura dövrünə aid balıqlar, köpəkbalıqları və ammonitlər də nümayiş olunur. Həmçinin müasir dəniz canlılarına dair eksponatlar da yer alır.

Təşkilatçılar bildirirlər ki, sərgi ziyarətçilərdə həm dəniz canlılarına maraq yaratmağı, həm də okeanların ekoloji əhəmiyyətini xatırlatmağı məqsəd daşıyır.