Lukaşenko Qırğızıstanın keçmiş prezidentinin Minskdəki həyatı barədə danışdı

Belarus Prezidenti Aleksandr Lukaşenko Qırğızıstanın keçmiş prezidenti Kurmanbek Bakiyevin Minskdəki həyatı barədə danışıb.

O, sabiq prezidentin ölkəsi üçün darıxdığını deyib.

“Bakiyev burada yaxşı yaşayır, normaldır. Onu artıq geri vermərik. Özünə də söyləmişəm ki, artıq belə bir şey olmayacaq, bəsdir, Belarusda yaşayın. Bəzən ona baş çəkirəm. O, çox kədərlidir, vətəni üçün darıxır. Deyir ki, heç olmasa, atasının qəbrini ziyarət etmək istəyir. Qırğızların öz prezidentinin atasının qəbrinə getməsinə icazə verməməsi təəssüf doğurur. Məncə, bu məsələni indiki rəhbərliklə həll edəcəyik”, – A.Lukaşenko bildirib.

Xatırladaq ki, Kurmanbek Bakiyev 2010-cu ildə Qırğızıstan prezidenti vəzifəsindən istefa verib. Ona qarşı 2010-cu il aprelin 17-də baş verən hadisələrdə həlak olan insanların ölümündə təqsirkar olması barədə qiyabi ittiham irəli sürülüb. Bu səbəbdən Belarusdan siyasi sığınacaq alan Bakiyev vətəninə qayıtmayacağını açıqlamışdı. Həmçinin o zaman Lukaşenko Qırğızıstanın keçmiş liderinin ekstradisiya edilməyəcəyini bəyan etmişdi.

2023-cü ildə Bişkekdə Kurmanbek Bakiyevin ölkəyə qayıdışına qarşı mitinq keçirilmişdi.