Makrondan Qərbi Afrika əsgərləri ilə bağlı açıqlama | Mühüm addımın əsas məqsədi

Fransa Prezidenti Emmanuel Makron ilk dəfə rəsmi olaraq 1944-cü ildə Qərbi Afrika əsgərlərinin öldürülməsini qətl adlandırıb.

Bu barədə xarici media Emmanuel Makronun Seneqal hökumətinə ünvanladığı məktuba istinadən məlumat yayıb.

E.Makron məktubda baş verənləri faciə adlandırıb və bütün həqiqətlərin müəyyən edilməsinin vacibliyini vurğulayıb.

Xatırladaq ki, 1944-cü il dekabrın 1-də İkinci Dünya müharibəsi zamanı Fransa Ordusunda döyüşən 400-ə qədər Qərbi Afrika əsgəri güllələnib. Buna səbəb əməkhaqqının ödənilməməsi nəticəsində baş verən üsyan olub. Ölənlərin əksəriyyəti "Seneqal atıcıları" müstəmləkə piyada korpusunun üzvləri olub.

Seneqal Prezidenti Bassiru Diomaye Faye məktubu şərh edərkən bildirib ki, bu addım Tiaroydakı hadisələr barədə həqiqətin üzə çıxması üçün yeni açılan qapıdır.

Məktubda həmçinin vurğulanıb ki, Fransa etiraf etməlidir ki, əməkhaqqı tələb edən əsgərlər və atıcılar arasındakı qarşıdurma qətliama gətirib çıxaran hadisələr zəncirini yaradıb.

E.Makronun bu addımı gərginliyi yumşaltmağa hesablanıb. Belə ki, Fransa ilə Qərbi Afrikadakı keçmiş müstəmləkələr arasında münasibətlər xeyli pisləşib. Seneqalda son seçkilərdə hakim PASTEF partiyası səslərin böyük əksəriyyətini qazandıqdan sonra yeni seçilən Prezident Bassiru Diomay Fay Fransa da daxil olmaqla xarici şirkətlərdən iqtisadi müstəqillik əldə etməyi hədəfləyib.

Seneqal Prezidenti onların ölkədəki fəaliyyətini məhdudlaşdırmağı planlaşdırır. O həmçinin ölkəsində Fransa hərbçiləri və jandarmasının olmamasını vacib hesab edir.