Marsda həyatın varlığını əngəlləyən bu imiş | NASA alimləri daha nələri üzə çıxardı?

Mars özünün ən qədim sirlərindən birini üzə çıxarıb.

Alimlərin bu prosesi qeydə ala bilməsi üçün onilliklər, bir kosmik aparat və “kosmik top gülləsi” lazım olub.

NASA-nın MAVEN missiyası ilk dəfə olaraq “səpilmə” adlanan prosesi birbaşa müşahidə edib. Bu, Günəş küləyindəki yüklü zərrəciklərin Mars atmosferinə çırpılması nəticəsində neytral atomların kosmosa atılması ilə müşayiət olunan bir atmosfer itkisi mexanizmidir. Bu şiddətli qarşılıqlı təsir Marsın sıx atmosferini və onun səthində maye suyu saxlamaq qabiliyyətini itirməsinin əsas səbəblərindən biri ola bilər.

Professor Şennon Karrinin sözlərinə görə, bu, top gülləsinin su hovuzuna atılması kimidir. Burada top gülləsi rolunu ağır ionlar oynayır, onlar yüksək sürətlə atmosferə çırpılır və neytral atomları və molekulları çölə sıçradırlar.

Bu kəşf Marsın bir vaxtlar yaşamağa yararlı planetdən necə soyuq və quraq dünyaya çevrildiyini anlamağa böyük töhfə verir. Həmçinin planetlərin necə inkişaf etdiyini və onların yaşamağa yararlı qalması üçün nələrin lazım olduğunu anlamağa da ipucu verir. Alimlər həmçinin Marsın gündüz və gecə tərəflərində, eləcə aşağı hündürlüklərdə ölçmələr aparıblar ki, bu da illərlə vaxt tələb edib.