Minabda məktəbə endirilən zərbə üçün kompensasiya tələbi | İranın Moskvadakı səfirindən açıqlama

İran ABŞ və İsraildən Minab şəhərində məktəbə endirilən zərbəyə görə kompensasiya tələb etməyi planlaşdırır.

Bu barədə İranın Moskvadakı səfiri Kazem Cəlali “İzvestiya” qəzetinə müsahibəsində bildirib.

Diplomatın sözlərinə görə, bu məsələ ilə bağlı tələblər artıq beynəlxalq instansiyalara göndərilib.

Cəlali qeyd edib ki, İranın xarici işlər naziri Abbas Əraqçi, demək olar, hər gün beynəlxalq təşkilatlara məktublar və mesajlar göndərərək onların hadisəyə reaksiya verməsini tələb edir.

Səfir bildirib ki, hazırda beynəlxalq hüquq ciddi şəkildə pozulub və ABŞ ilə İsrailin hərəkətlərini açıq şəkildə pisləyən beynəlxalq təşkilat tapmaq çətindir.

O həmçinin İrana qarşı münaqişənin başlanması qərarının da araşdırılmasının vacib olduğunu vurğulayıb.

“Onlar niyə bu addımı atdılar? Biz amerikalılarla danışıqlar aparırdıq və normal həyatımızı yaşayırdıq. Danışıqların ortasında isə bizə hücum etdilər. Bu, faciə və fəlakətdir. Beynəlxalq ictimaiyyət bu aqressiyanı pisləməli və buna reaksiya verməlidir”, – deyə Cəlali bildirib.