Mixeil Kavelaşvili: "Bu, terror aktıdır"

Gürcüstan Prezidenti Mixeil Kavelaşvili müxalifət lideri Aleko Elisaşvilinin hərəkətlərini və Gürcüstan hakimiyyətinin ötən ilin noyabrında etirazları dağıtmaq üçün kimyəvi maddədən istifadə etməsi ilə bağlı BBC xəbərini “terror aktı” adlandırıb.

Gürcüstanın Dövlət Təhlükəsizlik Xidməti BBC-nin 2024-cü ilin noyabr-dekabr aylarında Tbilisidə müxalifətin mitinqlərini dağıtmaq üçün hüquq-mühafizə orqanlarının zəhərli kimyəvi maddələrdən istifadə etməsi məlumatı ilə bağlı araşdırmaya başlayıb.

“Aleko Elisaşvilinin hərəkətlərinə və BBC-nin məqaləsinə eyni kontekstdə baxmaq lazımdır – bu, terror aktıdır. Hamının gözü önündə bir polis məmurunu “Molotov kokteyli” ilə yandırmağa çalışan Qriqoriadisdən necə qəhrəman yaratdıqlarını xatırlayın. Bunlar Gürcüstanın dövlətçiliyinə qarşı olan, terrorçu qüvvələrə, terror aktlarına tam olaraq ehtiyac duyan insanlardır”, – deyə Gürcüstan Prezidenti Mixeil Kavelaşvili bildirib.

Qeyd edək ki, hakim “Gürcü Arzusu” partiyası dekabrın 1-də təsdiqlənməmiş məlumatların yayılmasına görə BBC-yə qarşı beynəlxalq məhkəmələrdə iddia qaldıracağını bəyan edib.

Bir neçə gün əvvəl BBC bildirib ki, onun topladığı sübutlar Gürcüstan hökumətinin Tbilisidə nümayişçilərə qarşı Birinci Dünya müharibəsindən qalma kimyəvi silahlardan istifadə etdiyini göstərir.