NATO Baş katibindən çağırış | Ukrayna üçün nə tələb etdi?

Almaniya Ukraynaya mümkün qədər tez beş “Patriot” sistemi verəcək.

Bunu Almaniyanın müdafiə naziri Boris Pistorius Ukraynanın müdafiəsi üzrə Təmas Qrupunun “Ramştayn” formatında keçirilən iclasında səsləndirib.

“Sistemlərin Ukraynaya təhvil verilməsi planı yaxın günlərdə müəyyənləşəcək. Almaniya Kiyevi həmçinin əlavə hava hücumundan müdafiə sistemləri və lazımi sursatlarla da təmin edəcək”, ‒ deyə o bildirib.

Böyük Britaniya bu il üçün nəzərdə tutulan 990 milyon dollar yardım paketindən 200 milyon dollarlıq hava hücumundan müdafiə vasitələri və artilleriya mərmilərini artıq Ukraynaya göndərib. Bu barədə isə Böyük Britaniyanın müdafiə naziri Con Hili açıqlama verib.

“Maliyyələşdirmə həm də yeni pilotsuz uçuş aparatlarının alınmasına, həmçinin daha əvvəl göndərilmiş silahların təmiri və texniki xidmətinə yönəldiləcək. Onu da deyim ki, London ABŞ Prezidenti Donald Trampın Ukrayna üçün Amerika silahlarının alınmasını nəzərdə tutan planın həyata keçirilməsində iştirak etməyə hazırdır”, ‒ müdafiə naziri əlavə edib.

Kanada milli müdafiə naziri Devid Makqintinin sözlərinə görə, rəsmi Ottova Ukrayna Silahlı Qüvvələrinə "Leopard 2" tanklarının texniki xidməti üçün 14,6 milyon ABŞ dolları ayıracaq.

Bu arada, NATO Baş katibi Mark Rutte alyans ölkələrinin müdafiə nazirlərinə səslənib. O, Ukraynaya silah tədarükünü artırmağa çağırıb.