Nəticələri ağır olacaq! | Ərdoğandan İsrail barədə sərt çıxış

Türkiyə Prezidenti Rəcəb Tayyib Ərdoğan fələstinli həmkarı Mahmud Abbasla birgə keçirdiyi mətbuat konfransında İsrailə müraciət edib.

Ölkə başçısı rəsmi Tel-Əvivi qarşıdan gələn Ramazan ayında fələstinli müsəlmanların müqəddəs yerlərə girişinə mane olduğu təqdirdə ciddi nəticələrlə üzləşəcəyini bildirib:

“Qarşıdan gələn Ramazan ayı fonunda İsrailin təxribatlarının qarşısının alınmasının zəruriliyi ilə bağlı lazımi qurumlara mesajlarımızı çatdırırıq. Radikal İsrail siyasətçilərinin müsəlmanların Hərəm-Şərifə girişini məhdudlaşdırmaq tələbləri tamamilə cəfəngiyyatdır. Belə bir addımın atılmasının nəticələri, şübhəsiz ki, çox ağır olacaq.

Biz də fələstinli qardaşlarımız arasında birlik və konsensus əldə etmək səylərini yaxından izləyirik. Bu məqamda İsrailin zülmünə verilən ən gözəl cavablardan biri fələstinlilər arasında birlik və həmrəyliyin təmin edilməsidir. Biz bu sahədə üzərimizə düşəni etməyə hər zaman hazırıq”.

Məlumat üçün bildirək ki, Fələstin Prezidenti Mahmud Abbas üç günlük rəsmi səfər çərçivəsində Türkiyədədir. Fələstinli lider Türkiyə Prezidenti ilə Qəzzadakı vəziyyəti müzakirə edib və danışıqların nəticəsini keçirdikləri birgə mətbuat konfransı zamanı ictimaiyyətlə bölüşüblər.