Neyrotexnologiya ilə bağlı yazışma yayıldı

İnternetdə yayılan və “Epşteyn sənədləri” kimi təqdim olunan materiallar arasında 2017-ci ilə aid diqqətçəkən elektron poçt yazışması ortaya çıxıb. Sənəddə pandemiya simulyasiyası, neyrotexnologiyalar və səhiyyə məlumatlarının rəqəmsal təhlükəsizliyi ilə bağlı təkliflər əks olunub.

Yazışma “bgC3” adlı qurum çərçivəsində görüləcək işlərə həsr olunub və sənəddə elektron poçtun Bill Qeytsə ünvanlandığı, surətinin isə Larri Koenə göndərildiyi görünür.

Müəllif görülməsi planlaşdırılan əsas istiqamətləri təqdim edib: şəxsi tibbi məlumatların qorunması üçün yeni rəqəmsal sistemin yaradılması; ABŞ-də səhiyyə xərcləri ilə bağlı analitik hesabat; neyrotexnologiyaların xroniki və degenerativ xəstəliklərlə əlaqəsi; neyrotexnologiyaların milli təhlükəsizlik və kəşfiyyat məqsədləri ilə istifadəsi; “Strain” adlı pandemiya simulyasiyası üzrə tövsiyələr.

Sənədin yayılmasından sonra xüsusilə pandemiya simulyasiyasına dair bənd sosial şəbəkələrdə geniş müzakirələrə səbəb olub. İstifadəçilər bunu COVID-19 pandemiyasından illər əvvəl aparılan planlaşdırmaların sübutu kimi təqdim edirlər.