Nigeriya Prezidenti silahlı hücumu “qorxaq və vəhşi” adlandırıb

Nigeriyanın mərkəzində yerləşən Kvara ştatının Voro kəndinə fevralın 3-də gecə saatlarında edilən hücum nəticəsində 170 nəfər öldürülüb.

Yerli mənbələrin bildirdiyinə görə, bu, ilin əvvəllərindən bəri bölgədə qeydə alınan ən qanlı hücum sayılır.

Hadisə zamanı yolkənarı mağazalar tamamilə yandırılıb, icmanı qorumağa çalışan yerli özünümüdafiə dəstələrinin üzvləri öldürülüb.

Kaiama rayonunun icra başçısı Abubakar Danladi bildirib ki, 10–12 nəfərdən ibarət könüllü mühafizəçilər müqavimət göstərməyə çalışsa da, silahlılar onları binaya salaraq yandırıblar.

Hadisə yerinə gələn Kvara ştatının qubernatoru Abdulrahman Abdulrasaq yaxın günlərdə bölgəyə hərbi qüvvələrin yerləşdiriləcəyini və növbəti bir ay ərzində ərazinin tam nəzarətə götürüləcəyini vəd edib.

Nigeriya Prezidenti Bola Tinubu hücumu “qorxaq və vəhşi” adlandıraraq pisləyib və qeyd edib ki, silahlılar ekstremist qaydaların tətbiqini rədd edən dinc sakinləri hədəf alıblar.

Rəsmilər bölgədə təhlükəsizliyin gücləndiriləcəyini və hücumu törədənlərin məsuliyyətə cəlb olunacağını bildirib.