Nüvə müharibəsi başlayır? - Putin bilir ki, bu, son olacaq

Ukraynada 2 ildən çoxdur gedən müharibənin miqyası daha da qloballaşır.

Qərbin Ukraynaya hərbi kontingent göndərəcəyi ilə bağlı xəbərlərin ardınca, Rusiya Prezidenti Vladimir Putinin nüvə hücumuna hazır olması barədə açıqlaması vəziyyəti daha da gərginləşdirib.

Ukraynalı ekspertlər hesab edirlər ki, Qərblə gərginlik artarsa, Rusiyanın nüvə silahından istifadəsi reallaşa bilər.

Hərbi-siyasi şərhçi Taras Berezovets bildirib ki, təhdidlər Rusiya ilə Qərb arasında münasibətlərin indiki çətin mərhələsi ilə bağlıdır:

"Bildiyiniz kimi, Fransa Prezidenti Emmanuel Makron, eləcə də bir sıra digər Qərb liderləri Ukrayna ərazisinə bir sıra Qərb ölkələrinin silahlı qüvvələrinin göndərilməsinin mümkünlüyünü bəyan ediblər. Hazırda onların hərbi əməliyyatlarda birbaşa iştirakından söhbət getmir. Lakin bu sözlər Kremli hədsiz dərəcədə qorxudub, bunu həm Putinin özünün, həm də Rusiya Xarici İşlər Nazirliyinin nümayəndələrinin isterik reaksiyaları sübut edir.

Rusiyanın keçmiş prezidenti Dmitri Medvedev və Putin də bəyan etmişdi ki, Qərb ölkələrinin hər hansı silahlı birləşmələrinin Ukraynada görünməsi onları nüvə silahından istifadə riski ilə müharibəyə sürükləyəcək. Bu təhdidlər praktiki şəkildə həyata keçirilməyəcək. Hazırda nə Ukraynada, nə də üçüncü ölkələrdə Putinin nüvə silahından istifadə etməsi təhlükəsi var. O, bundan sırf virtual təhlükə kimi istifadə etməkdə davam edir. Gördüyümüz kimi, Qərb liderləri buna tab gətirməyiblər və buna cavab vermək niyyətində deyillər".

Qeyd edək ki, Fransa Prezidenti Emanuel Makron Ukraynaya ordu göndərəcəyi ilə bağlı bəyanat verərək vəziyyəti daha da gərginləşdirib.