Odessa istiqamətində yük gəmiləri və liman infrastrukturu hədəfə alındı

Rusiya Ordusu Odessa vilayətində Çernomorsk limanından Odessa limanına hərəkət edən daha iki quru yük gəmisinə pilotsuz uçuş aparatları ilə zərbə endirib.

Bu barədə Rusiya Müdafiə Nazirliyi məlumat yayıb.

Qeyd olunub ki, bundan əvvəl eyni istiqamətdə hərəkət edən tankerə də PUA ilə hücum edilib.

Ukrayna rəsmilərinin məlumatına görə, hücum nəticəsində gəmilərdən birində yanğın baş verib və ziyan dəyib, ekipaj üzvləri təxliyə edilib.

Rusiya Müdafiə Nazirliyi Odessa vilayətində yanacaq-sürtkü materiallarının boşaldılması üçün istifadə olunan liman infrastrukturu obyektlərinin və yanacaq-sürtkü materialları saxlanılan yeddi rezervuarın da vurulduğunu bildirib.

Bu arada Ukrayna Ali Radası ölkədə tətbiq olunan hərbi vəziyyətin və ümumi səfərbərlik rejiminin müddətini növbəti dəfə uzadıb. 311 deputat ümumi səfərbərliyin avqustun 2-dən etibarən daha 90 gün müddətinə uzadılmasının lehinə səs verib. Beləliklə, səfərbərlik rejimi 31 oktyabr tarixinə qədər qüvvədə olacaq.